جىل باسىنان بەرى ءبىر مىڭ جۇمىس بەرۋشى مەديتسينالىق ساقتاندىرۋ قورىنا تولەم اۋدارماعان. قۇزىرەتتى ورگان وكىلدەرى قارىزى بار سالىق تولەۋشىلەردەن بەرەشەكتى ءوندىرىپ الۋ بويىنشا ءتيىستى ءىس-شارالاردى باستاپ كەتتى.
مىندەتتى الەۋمەتتىك مەديتسينالىق ساقتاندىرۋ تۋرالى زاڭعا ەنگىزىلگەن وزگەرىستەرگە بايلانىستى جەكە كاسىپكەرلەر قاراماعىنداعى ەڭبەككەرلەر ءۇشىن مەديتسينالىق ساقتاندىرۋ قورىنا اي سايىن اۋدارىمدار جاساۋعا مىندەتتى. الايدا, ول ەرەجەگە باعىنباي وتىرعاندار وڭىردە از ەمەس.
«مىندەتتى الەۋمەتتىك مەديتسينالىق ساقتاندىرۋ تۋرالى زاڭعا سايكەس جۇمىس بەرۋشى جالاقىنىڭ 1,5 پايىزى كولەمىندە قورعا اي سايىن اۋدارىمدار جاساپ تۇرۋى ءتيىس. بۇگىندە بۇل تالاپتى پەتروپاۆل قالاسى بويىنشا ءبىر مىڭعا جۋىق كاسىپكەر ورىنداماعان. مەديتسينالىق ساقتاندىرۋ قورىنا ءتيىستى سوما اۋدارىلماسا,ادامدارعا تەگىن دارىگەرلىك كومەك كورسەتىلمەيدى», دەيدى قالالىق مەملەكەتتىك كىرىستەر باسقارماسىنىڭ ءبولىم باسشىسى ناتاليا ەلمۋرادوۆا.
ونىڭ ايتۋىنشا مەديتسينالىق ساقتاندىرۋ قورىنا جارنا تولەمەۋ اكىمشىلىك قۇقىقبۇزۋشىلىق بولىپ ەسەپتەلەدى. ءبىرىنشى رەت ەرەجە بۇزعان سالىق تولەۋشىگە ەسكەرتۋ بەرىلەدى. بانك شوتتارى مەن قارجى وپەراتسيالارىنا ۋاقىتشا شەكتەۋ قويىلادى.
اتالعان فاكتىلەر بويىنشا 50 سالىق تولەۋشىگە قاتىستى اكىمشىلىك ءىس قوزعالعان. 226 جۇمىس بەرۋشى ەسكەرتۋ العان.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.